Gwamnan jihar Kaduna, Malam Nasir El-Rufai, ya sake jaddada cewa daukacin gwamnonin jam’iyyar APC na bayan dan takarar shugaban kasa na jam’iyyar, Asiwaju Bola Ahmed Tinubu.
Kazalika gwamnan ya bayyana hakan ne a wata tattaunawa ta kai tsaye a kafafen yada labarai da aka watsa a dukkanin gidajen rediyon Kaduna, cewa suna goyon bayan matakin da Tinubu ya dauka na zaben Sanata Kashim Shettima a matsayin abokin takararsa.
El-Rufa’i ya ce irin nasarorin da Tinubu ya samu a matsayin gwamnan jihar Legas yana da ban sha’awa kuma ‘’ mun yi imanin cewa zai yi abin da ya yi a matakin kasa, idan ya zama shugaban kasa.
Gwamnan ya kuma ce Sanata Kashim Shettima ya cancanta a matsayin mataimakinsa domin ya aiwatar da ayyukan raya kasa da dama, a lokacin da rikicin Boko Haram ya daidaita, a matsayinsa na gwamnan jihar Borno.
El-Rufai ya kuma nuna cewa Asiwaju Tinubu da Sanata Shettima sun goyi bayan wadanda suka gaje su da suka ci gaba daga inda suka tsaya, don gyaran kasa.
A cewarsa, rashin amincewa da tikitin takarar shugaban kasa na jam’iyyar APC musulmi da musulmi munafunci ne kawai domin ‘’idan muka shiga jirgin sama, ba ma tambayar wane imani matukin jirgin ne, abin da muke so shi ne mu sauka lafiya.
Haka nan, idan muka je wurin likita lokacin da ba mu da lafiya, abin da muke so shi ne mu sami lafiya kuma mu tafiyar da rayuwarmu ta yau da kullun. Haka kuma idan ka kai yaro makaranta, abin da kake so shi ne a koyar da shi yadda ya kamata, ba ka damu ko likita ko malami musulmi ne ko Kirista ba,’’ inji shi.
Gwamnan ya yi nuni da cewa a matsayinsu na masu zaman kansu ’yan Najeriya na daukar mafi kyawu don ko dai su yi musu aiki ko kuma su dauki aikinsu amma idan ana maganar nadin gwamnati sai su rika tafka muhawara kan imanin dan takarar.