Biyo bayan karuwar rashin tsaro da ake fama da shi a sassan kasar nan, ciki har da babban birnin kasar, Abuja, gwamnan jihar Kaduna, Malam Nasir El-Rufai, ya jaddada matsayinsa na cewa, hanya mafi dacewa ta magance matsalar ita ce jefa bama-bamai a sansanonin ‘yan ta’adda da kuma lungu da sako na kasar domin tunkarar matsalar.
 |
| El-Rufa'i |
Gwamnan wanda ya koka kan yadda rashin tsaro ke kawo koma baya a Najeriya, ya ce fatansa kawai shi ne gwamnatin tarayya ta yi amfani da daren soji da sauran jami’an tsaro wajen tunkarar ‘yan ta’adda.
Ya ce, “Na sha fada a kodayaushe – kuma jama’ar Jihar Kaduna sun san cewa tun kimanin shekaru biyar da suka wuce nake cewa ya kamata mu yi amfani da sojoji da na sama wajen jefa bama-bamai a kan wadannan mutane. Babu yadda za a yi a kawo karshen wannan kalubale, sai dai mu yi hakan.”
A cewarsa, shugaban kasa Muhammadu Buhari bai san barazanar da ‘yan ta’addan ke yi na sace shi ba har sai da ya kai ga sanar da shugaban.
A ranar Juma’ar da ta gabata ne ‘yan ta’addan suka fitar da wani faifan bidiyo a karshen mako da suka yi awon gaba da wasu fasinjojin jirgin kasa a ranar 28 ga Maris, 2022, inda suka yi barazanar sace Shugaba Buhari da Gwamna El-Rufai da sauransu.
El-Rufai ya ce tun shekaru biyar da suka gabata yana ta kiraye-kirayen a kai harin bam a sansanonin ‘yan ta’adda a duk inda suke, yana mai cewa ita ce kadai mafita ga matsalar.
Da yake magana a wani shirin rediyo a daren ranar Laraba, gwamnan ya kuma bayyana cewa an yi masa barazana tare da iyalansa.
Ya ce, “Rashin tsaro babban kalubale ne, abin da ke daure kai shi ne, duk da kokarin da muke yi a matakin jiha lamarin sai kara ta’azzara yake yi. Hakan na shafar kokarin da muke yi na shigo da masu zuba jari a jihar, har ma wadanda suka zuba jarin kasuwancinsu ba ya tafiya kamar yadda ake tsammani.
A cewarsa, tashe-tashen hankula a kasar nan sun yi tasiri matuka a harkokin tattalin arziki, da suka hada da ayyukan gine-gine a sassan jihar, kuma ya yi kamari tun bayan harin da aka kai kan jirgin Abuja zuwa Kaduna.
“Hakika rashin tsaro yana mayar da mu baya. Yanzu ta kai matsayin da ‘yan ta’adda za su je gidan yarin Kuje su ‘yanto mutanensu. Kuma har ma sun yi wani faifan bidiyo inda suke barazanar sace shugaban kasa Muhammadu Buhari da ni da kaina, su kai mu dajin su.” Inji El-Rufai, wanda dan jam’iyyar APC mai mulki ne a wata hira.
“Abin da ya faru a cikin wannan makon shi ne ya sanya na nemi ganin Shugaban kasa kuma na kira shi cewa ina bukatar ganin sa.
Don haka, ya ba ni alƙawari ranar Lahadi kuma na je na gan shi. Sannan na ba shi labarin abubuwan da ke faruwa a baya-bayan nan, musamman faifan bidiyon da 'yan ta'adda suka fitar. Hasali ma, har zuwa wannan lokacin, bai ma sani ba.
Don haka na ce washegari, wato ranar Litinin, Gwamnan Jihar Zamfara, Bello Matawalle ya tabbatar masa da cewa har ya ga bidiyon, don haka akwai bukatar mu dauki mataki.
“Shugaban kasa ya shaida min cewa ya gana da hafsoshin tsaro kamar kwana uku ko hudu kafin in gana da shi, kuma ya ba su wata kwakkwarar kwarya-kwaryar doka cewa dole ne su gudanar da wani gagarumin aikin soji domin kawo karshen wadannan mutane. Da yardar Allah, za mu ga karshen wadannan kalubale.
Fatanmu shi ne sojoji da ‘yan sandan da aka ba wannan umarni su gaggauta aiwatar da aikin,” in ji El-Rufai.